Cəmiyyətin inkişafı boyunca qazanılmış dəyərlərin hamısı psixoloji enerjinin hesabına əldə edilmişdir. Psixoloji enerji ruhun, bir növ, bioloji ̶- elmi adıdır. Əbəs yerə deyil ki, müdrik insanlar həmişə bədənlə düşüncənin vəhdətindən bəhs etmişlər; Yer üzündə insanları bütün digər canlılardan ayıran atribut şüurdur. Ayrıca götürülən hər bir vaxt kəsiminin dəyərini insanın psixoloji enerjisinin xarakteri müəyyən edir.

Bu gün özünü dərk edib sivil cəmiyyətdə yaşamağa can atan hər bir insan özlüyündə bir psixoloqdur. Bəziləri bunu papulizm kimi anlasa da, psixoloji mövzuya fərdi diqqətin ayrılması fəal insan mövqeyi adlandırılsa, daha uyğun olar. Bununla belə, nəinki sivil fərdlərin, hətta psixoloq mütəxəssislərin də sahə üzrə elmi biliklərə ehtiyacı olur. Psixolji amilin yaşı insan varlığının formalaşdığı ilkin başlanğıcdan üzü bəri hesablansa da, psixologiya gənc elm sahəsidir və o, heç zaman indiki qədər aktual olmayıb.